Юрий Анисимович 1936 сыллаахха алтынньы 6 күнүгэр Сунтаар улууһугар Садын нэһилиэгэр төрөөбүтэ. Юрий аҕата Анисим Васильевич (Улахан Анньыыһын) мин аҕам Алексеев Егор Васильевичтыын бииргэ төрөөбүттэр, онон биһиги чугас аймахпыт этэ. Ийэтэ Марина хоту Эбээн-Бытантайтан төрүттээх.
Юра кыра эрдэҕиттэн музыкаҕа сыһыаннаах баяҥҥа оонньуура үһү. Түүлээххэ 1967 сылтан баяниһынан, 1970 сыллаахха Тандаҕа баяниһынан үлэлээбит.
Мин 1970 сыллар саҥаларыгар Дьокуускайга педучилищеҕа үөрэммитим. Верхоянскайтан сылдьар кыыһы кытта бииргэ үөрэммитим. Оччолорго Юрий Анисимович хоту үлэлээбит баяниһынан кулуупка. Онтон миэхэ сурук ыыппыт этэ “Үчүгэйдик үөрэн, эн аҕаҥ миигин уруургуур, көмөлөһөр этэ, үөрэхтээх киһи буол.” диэн. Сотору почтанан харчы перевод ыыппыта, онно үөрбүппүн билигин да өйдүүбүн. Кэнники сибээспит быстыбыта.
Юрий Анисимович туһунан сырдык өйдөбүлүм итинник.
Наҕараадата Саха АССР президиумун Бочуотунай Грамотата.
Күн сириттэн 1976 сыллаахха ахсынньы 21 күнүгэр суох буолбута.
Ахтыыны суруйда Винокурова (Алексеева) Люция Егоровна
Олунньу 2023