Бастакы күн билсэ таарыйа “Сурук-бичик күнүгэр” аналлаах 10 ыйытыкка тута эппиэттээһиҥҥэ “Хатырык мэтээллэр” – Елена Потаповаҕа, Людмила Устиноваҕа, Анна Апросимоваҕа туттарылыннылар. “Күн киһитэ” анал аат Анастасия Андрееваҕа иҥэрилиннэ.
Иккис күн – тылбаас күнэ. Бу хоһоон дьиктитэ диэн саха хоһоонун нууччалыы ааҕыахтарын баҕарбыттарын иһин литературнай тылбаасчыт Василий Полятинскай тылбаастаабыт. Сорудаҕа: төһө кыалларынан оригиналыгар чугаһата сатыахтаахтар. Сорудах сарсыарда бэриллибитин кэннэ күнү быһа кыттааччылар толкуйдаан, тылбаастаан ыыппыттарын кэннэ Степанида Иванова хоһоонун кытта тэҥнээн көрүү түмүгэр “Хатырык мэтээл” хаһаайыннарынан Елена Потапова, Галина Петрова, Агафья Афанасьева буоллулар, онтон “Күн киһитэ” анал аат Вуталина Стручковаҕа тигистэ.
Үһүс күн – киинэ күнэ. Икки чаас иһигэр ыытыллыбыт хартыыналарга сахалар араас сылларга улахан экраҥҥа таһаарбыт киинэлэрин эпизодтарын таайыы буолбута. Бу күрэххэ “Хатырык мэтээл” хаһаайыннарынан Татьяна Неустроева, Федора Борисова, Людмила Устинова буоллулар. “Күн киһитэ” анал аатынан бу сырыыга Агафья Афанасьева, Анна Апросимова наҕараадаланнылар.
Төрдүс күн – хартыына күнэ. Сааспытын көһүтэ таарыйа саҥа санаалары, саҥа көрүүлэри Афанасий Осипов бэриллибит түөрт хартыынатыттан биири талан хоһуйуу-хоһоон суруйуутугар холонон көрүү буолла. Сорудах сарсыарда эрдэ бэриллэн күнү быһа тылларын чопчулаан, кылааккайдаан 17 кыттааччы Афанасий Осипов “Разговор о буднях” хартыынатыгар 3 киһи, “Весеннее утро на участке коневодов” – 2 киһи, “Весенний день в долине Эркээни” – 10 киһи, “Лошадки под мартовским солнцем” – 2 киһи хоһоон суруйбуттар. Бу күрэх түмүгүнэн “Хатырык мэтээл” Агафья Афанасьеваҕа, Вуталина Стручковаҕа, Вера Слепцоваҕа тигистэ. “Күн киһитэ” анал аат Мария Стручковаҕа иҥэрилиннэ.
Бэһис күн – ырыа күнэ. Сорудах: урукку, билиҥҥи биллэр ырыаларга тылларын уларытан (бэйэлэрин айбыт хоһоонноругар) сүрүн куплетын ыллаан ыытааһын. Бу күрэххэ 12 киһи кытынна. “Хатырык мэтээл” хаһаайыннарынан Анна Рожина, Татьяна Неустроева, Мария Стручкова буоллулар. “Күн киһитэ” анал аат Лия Аммосоваҕа, Мария Колесоваҕа тигистэ.
Алтыс күн – “Бүттүүн литература” (үс чахчы) викторина күрэҕэ буолла. Викторинаҕа аан дойду, нуучча, саха литературата барыта киирбитэ, үс чахчы (быһаарыы) баара, манан сирдэтинэн айымньы аатын, суруйааччыны, айымньы жанрын таайыы буолла. Сорудах хас биирдии кыттаачыга ыытыллыбытын кэннэ 1,5 чаас иһигэр 30 ыйытыкка эппиэттии охсуохтаахтар этэ. Бу күрэххэ 13 киһи кыттыыны ылла. “Хатырык мэтээл” хаһаайынынан Анна Апросимова буолла, “Күн киһитэ” анал аат Елена Потаповаҕа тигистэ.
Алта күннээх күрэс кэннэ Добун сурук III үрдэлинэн Вуталина Васильевна Стручкова (Ьулуҥ улууһа, Тикси), II үрдэлинэн Вера Семеновна Слепцова (Дьааҥы оройуона, Бөтөҥкөс сэлиэнньэтэ) наҕараадаланнылар. Онтон кыайыылааҕынан Елена Семеновна Потапова (Дьааҥы оройуона, Адыаччы бөһүөлэгэ) таҕыста. Маны таһынан “Бастыҥ көҕүлээччи” анал аатынан Татьяна Афанасьевна Неустроева (Амма) бэлиэтэннэ, “Көрөөччү биһирэбилэ” анал аакка Вера Семеновна Слепцова тигистэ.
Кыттааччыларбар, коллегаларбар махталбын биллэрэбин.
